Mondragon Unibertsitateak 18 titulu berri eskainiko ditu datorren ikasturtean

Mondragon Unibertsitateak jakinarazi du 2022/2023 ikasturte honetarako bere eskaintza akademikoa gradu, ikastaro eta master berriekin zabalduko dela, besteak beste. Zehazki, unibertsitateak 18 titulu berri eskainiko ditu, honela banatuta: gradu bat, bost master, sei ikastaro aditu, espezializazio ikastaro bat, programa exekutibo bat eta lau aipamen eta ibilbide berri. Jakinarazi dutenez, eskaintzen dituzten zortzi ezagutza-arloetan banatuta daude guztiak: Ingeniaritza, enpresa-kudeaketa, ekintzailetza, hezkuntza, komunikazioa, humanitateak, kooperatibismoa eta gastronomia.

Eskaintza berri horri unibertsitateak ikasturte akademiko honetan eman duenari gaineratu behar zaio. Haien artetik, 18 gradu-titulu, 19 unibertsitate-master eta lau doktorego-programa nabarmentzen dira, baita zortzi jakintza-arlo horietako graduondokoak, berezko tituluak eta aditu-ikastaroak ere.

Mondragon Unibertsitateak azaldu duenez, eskaintza berriaren helburua gizartean gertatutako aldaketen beharrei erantzutea da, bai eta prestakuntza berrien bidez horiekin bat datozen lanpostuak betetzeko beharrari erantzutea ere.

Berritasunak

Goi Eskola Politeknikoa (6)

• Industriari Aplikatutako Ingeniaritza Fisikoko Gradua
• Energia Sistema Adimendunak Unibertsitate Masterra
• Operazio Logistiko eta Produktiboen Zuzendaritzako Unibertsitate Masterra
• Profesionalentzako Osasun Adimen Artifiziala eta Silver Economy Masterra
• Metalen Fabrikazio Gehigarri Industriala aditu-ikastaroa
• Plastiko eta Konpositeen Fabrikazio Gehigarri Industriala aditu-ikastaroa

Enpresagintza (2)

• Negozio Inteligentziarako Datuen Analisia / Business Analytics Unibertsitate Masterra
• Inpaktuzko Ekintzailetasuna eta Inbertsioa aditu-ikastaroa

Humanitateak eta Hezkuntza Zientziak (7)

• Humanitate Digital Globalak (HDG) Graduak bi ibilbide jarriko ditu abian: Digital Humanities eta Global Studies.
• Haur Hezkuntzako eta Lehen Hezkuntzako graduetan, bi aipamen berri eskainiko dira modalitate erdipresentzialean: Entzumena eta Hizkuntza, eta Psikomotrizitatea
• Berrikuntza eta Kudeaketa Kooperatibismoan aditu-ikastaroa
• Ikus-entzunezko ekintzailetza eta berrikuntzako aditu-ikastaroa
• Marketin eta Komunikazioko prestakuntza-aditua Lanbide Heziketarako

Gastronomia Zientzien Fakultatea-Basque Culinary Center (3)

• Gastronomiako Irakasle Prestakuntza Masterra, Humanitate eta Hezkuntza Zientzien Fakultatearekin lankidetzan
• Food&Beverage Zuzendaritzako programa exekutiboa
• Jatetxeen kudeaketa jasangarriaren espezializazio-ikastaroa