Musika, udazkeneko fruitua

Udazkena fruitu lehorren garaia da, baina Urretxun baita musika garaia ere. Udazkeneko Musika Zikloaren garaia. 36. edizioa igandean hasiko da. Lehen kontzertua Urretxu eta Zumarragako Goiargi abesbatzak egingo du. Azaroaren 1ean Letoniako Maska Koris abesbatzak abestuko du, azaroaren 6an Oskarbi taldeak eta Goiargik eta azaroaren 13an Irungo Nayade abesbatzak. Kontzertu guztiak San Martin de Tours elizan izango dira, 19.00etan.

Zikloa atzo aurkeztu zuten. Ekitaldian Maialen Fidalgo zinegotziak eta Javier Arratibel Goiargi abesbatzako zuzendariak parte hartu zuten.

Fidalgok zikloa oso errotuta dagoela aipatu zuen. “Iaz ere ospatu genuen, nahiz eta covidak baldin-tzatuta izan. Hitzordua eskatu eta maskara eraman behar zen arren, kontzertu guztietan eliza bete egin zen”. Arratibelek eskerrak eman zizkien musika zikloa aurrera ateratzea posible egiten duten guztiei: Urretxuko Udala, parrokia, prentsa eta ikusleak.

Igande honetako emanaldiari dagokionez. Lesbordes, Tomer, Madina, Sandvold, Tye, Stopford, Forrest, Busto eta Marshallen obrak abestuko dituzte.

Letoniatik Tolosara

Letoniako Maska Koris abesbatza Tolosako lehiaketa ospetsuan parte hartzeko etorriko da Euskal Herrira. Urretxun Tolosan abestuko dituzten kanta berberak abestuko dituzte: Euskal Herrikoak eta Letoniakoak. Euskal Herrikoak Lorenzo Ondarraren Bi Gabon kanta eta Josu Elberdinen Izar ederrak eta Ave Maria izango dira.

Ez Dok Amairuko kide izan zen Oskarbi abesbatzak, berriz, bere errepertorioko hamaika kanta joko ditu. Horietako bost, Goiargiko kideekin.

Aurtengo zikloko azkeneko emanaldia Irungo Nayade abesbatzak egingo du, azaroaren 13an. Emakumeen abesbatza hau 1997an sortu zen. Irun eta Hondarribiko 30 emakumek osatzen dute eta Alaitz Urkiak zuzentzen du.

Urretxun, Lauridsen, Azurmendi, Whitacre, Elder, Busto, Ugalde, Andreo, Sarasola, Gerrero eta Gjeilo konpositoreen obrak abestuko dituzte. l