Nork bere esparrutik, erronka berberak helburu

Izaten dira bateko eta besteko helburuak, lortu nahiak, jomuga zehatzak. Badira horiek lortzeko bideak, eginbeharrak, erronkak. Beste batzuen artean, LGTBIQ+ kolektiboak ere badu lehenengotik, eta baita bigarrenetik ere. Badu non egin, zeri ekin, zer aldarrikatu, zertaz hausnartu. Oraingoan, musikan dituzten erronkez aritzeko elkartu dira, bi egunez, Bilbon, saio eta jarduera anitzetan.

Musika Bulegoak antolatzen dituen Hots&Hitz jardunaldien hirugarren edizioaren baitan, mahai-inguru, proiekzio eta beste jaso ditu Bizkaiko hiriburuak. Hain justu, Bilboko La Sinsorga kulturgune feminista eta Bilborock izan dira, aurten, jardueren lekuko. Hirugarren honetan, gainera, aliantza edo elkarlan berrien eskutik ailegatu zaio herritarrari Hots&Hitz egitasmoaren egitaraua.

Aipatu aldaketa horien atzean, dena den, aurreko bi urteetako helburu eta asmo berberak daude. Alegia, musika sektorearen egoerari buruz berdintasunean hausnartzea, LGTBIQ+ kolektiboko musika sortzaile eta profesionalak ikusaraztea eta Euskal Herriko musika sektoreak, gai horiei dagokienez, izan ditzakeen erronka ezberdinak identifikatzea edo komunean detektatzen dituzten arazo ezberdinei buruz hitz egitea.

Erronka horiekin bat eginda elkarlanean aritu dira jardunaldi horien antolakuntza eta gauzatzean Musika Bulegokoak, Zinegoak jaialdikoak eta Anitzak elkartekoak. Urtean zehar nork bere esparruan eta egunerokotasunean lan egiten duen arren, kasu honetan, hiru elkarteek badituztela “balore dezente komunean”, azaldu du Areta Senosiain Musika Bulegoko kideak. Bai Zinegoak, bai Anitzak pozik agertu dira aurtengo edizioan Musika Bulegoarekin batera elkarlanean aritu izanaz, eta biek tankera horretako elkarlanen garrantzia azpimarratu dute. “Musika arloan hausnarketa hau egitea, alegia, euskal erreferenteei ahotsa ematea, oso inportantea iruditzen zaigu”, esan du Anitzak taldeko Alfonso Setieyek. Aipatzen duen hausnarketa hori sektoreak bizi duen egoerari erreparatuta abiatu dute; izan ere, hirurek bat egiten dute kontatzen dutenean sektoreak, bere orokortasunean, gabezia asko dituela, eta hala azaltzen du Musika Bulegoko kideak: “Musika Bulegoaren helburuetako bat da musika bere aniztasunean babestea eta indartzea, eta uste dugu oraindik ez daudela hori lortzeko baldintzak”. Gauzak horrela, lanean jarraitu behar denaren zalantzarik ez du, “berdintasun hori esparru guztietan lortu arte; bai programazioetan, bai erreferenteetan, bai musika presente dagoen ekitaldietan gune seguruak izatea bermatzean…“.

Bilbon egin dituzte Hots&Hitz jardunaldiak. OLGA RUIZ - SERGIO VERDE

Anitzak taldekoa bat dator Musika Bulegokoak aipatutako gabeziekin, eta gune seguruetan jarri du arreta: “Egon daiteke LGTBIQ+ kolektiboari lotutako programazioa, baina gero, eraso homofoboak gertatzen dira. Horregatik, puntu morea jartzearekin batera, guri gustatuko litzaiguke ostadar puntua ere egotea”.

Bilbon egin dituzte Hots&Hitz jardunaldiak. OLGA RUIZ - SERGIO VERDE

Zinegoakeko kideak ere uste du aurreko biek aipatutakoak lortzeko egin behar dela lan. Jardunaldiak horretarako erremintatzat hartu daitezkeela uste du. “Iruditzen zait ikusentzunezkoetan presentzia nahiko baxua dela; egia da azkenaldian badaudela emakumearen egotea indartzen duten proiektuak, baina nik uste dut proiektuak beharrezkoak direla”.

Senosiainen arabera, askotan, berdintasunaren gaiari “zuriketa batetik” heltzen zaio, “itxura batetik”, baina benetan ez dagoela aldaketa sakonik deritzo. Horregatik, ezin dela guardia jaitsi uste du. Hori horrela, pertsona guztiak izendatu ditu egoera aldatzearen erantzule: “Noski, beti egongo gara jaialdi handiak, baina administrazio publikoei ere eskatu behar zaie esku hartzea, haien parte hartzerik gabe ezinezkoa delako -haiek kudeatzen dutelako parte handiena, edo, behintzat, ikusten dena-; hala ere, egunerokoan eta txikitasunean ere asko dago egiteko”. Setiey ere bat dator Musika Bulegoko kidearen adierazpenokin, eta argi dauka erantzukizuna eskatu behar zaiela bai antolatzaileei, bai instituzioei. Publikoari ere zuzendu zaio; dio ondo legokeela publikoak balioan jartzea egiten den ahalegina; alegia, kontuan hartzea ekitaldi batek bermatu duela baten baten azaltzeko era, edo zinemaldi batera eraman dutela beste hura… Modu berean, argi dauka defendatzen duten guztiari ikusgarritasuna eman behar zaiola, “azkenean, ikusten ez dena badirudielako existitzen ez dela”. Horrela, eta hirugarrenez, ikusgarritasuna ematen saiatu dira Hots&Hitz jardunaldien bitartez aipatutako gaiari. Eseri dira hausnartzeko, hartu dute tartea ondorioak ateratzeko, eta modu eroso eta gordinean aritu diren hizlarien laguntzaz, mahai gaineratu dituzte neurri edo tresna interesgarriak, betiere, musika sektoreak berdintasun edo dibertsitateari dagokionez izan ditzakeen gabeziei aurre egiteko. Hala, beste behin, markatu dituzte ibilbidearen hurrengo pausoak.