Olagibelgo EAG egunean 24 orduz irekitzea proposatu du EH Bilduk

EH Bilduk San Martingo Etengabeko Arreta Gunea (EAG) berriro irekitzea eta Olagibelgoak eguneko 24 orduetan zerbitzua ematea proposatu du Gasteizerako.

Hori da Arabako eta hiriburuko osasun-arreta hobetzeko dekalogo baten barruan aurkeztu duen proposamenetako bat. Dekalogo horretan, Santiago Ospitaleko larrialdi-zerbitzua herritar guztientzat berriro irekitzea ere jasotzen da.

Eva Lopez de Arroyabe EH Bilduko ahaldun nagusigaiak mamografo ibiltari bat martxan jartzea proposatu du. "Horrela, narriadura berreskuratzeko eta arreta duintzeko proposatutako neurrien artean, EH Bilduk Santiago Ospitaleko Larrialdi Zerbitzua herritar guztientzat berriro irekitzea proposatu du", azaldu dute EH Bildutik. Bestalde, Etengabeko Arretako Guneei dagokienez, berriz, San Martingo EAG berriro irekitzea proposatu du, eta Olagibelgo EAGk 24 orduko arreta eskaintzea. Ildo horretan, Viterok defendatu du "ezinbestekoa" dela udalak udalerriari beharrezko osasun-azpiegiturak ematea, adibidez, "Alde Zaharreko osasen zentroa lehengo hospizioaren eraikinera lehenbailehen eramatearen alde eginez, eta Olarizuko zonaldea anbulategi duin batez hornituz. Ildo beretik, Sansomendiko edo Pilarreko osasun zentroek dituzten gabeziak konpontzeko beharra", azpimarratu du.

Arabako lurralde historikoari dagokionez, López de Arroyabek azpimarratu du "lehen mailako arreta hobetu eta indartu behar da, errefortzu bat planifikatuz eta etxeko ospitaleratzearen aukera Lurralde Historiko osora zabalduz". Gainera, landa eremuan bizi diren emakumeen eskaerei erantzunez, EH Bilduk mamografo ibiltari bat martxan jartzea proposatu du, "mamografia bezalako ohiko kontuetarako ehunka emakumek Gasteizera egin behar dituzten lekualdaketei amaiera emateko", ondorioztatu duenez.