1722. urtean sortu zen orain Konstituzio Plazaren izenarekin ezagutzen dugu, Plaza Berria zuen, orduan, izena, baina politikarien erabakiek lehenengo izen aldaketa eragin zuten 1820.ean eta Cadizko Konstituzioaren omenez, Plaza de la Constitución izena jaso zuen. Sasoi horretan bi izenek elkarbizi zuten, herri xeheak jarraitu baitzuen Plaza Berria deitzen. Ahoz aho eta belaunaldiz belaunaldi izen horri eutsi zitzaion., horregatik, 1897. urtean, Udal Batzarrak erabaki bitxia hartu zuen: plazaren izena gazteleraz Plaza de la Constitución izango zela eta euskaraz, Plaza Berria.
Urte batzuetan zehar elkarbizitza izan zen, baina 1936.ean frankistek berehala aldatu zioten izena berriro eta Plaza del 18 de julio bataiatu zuten, euskarazko aukerarik eskaini gabe, orduan, bertakoek La Custi deitzera pasatu ziren.
Historiako atal ilun hori igaro eta 1979. urtean berriro erabaki zen Plaza de la Constitución izena jartzea eta euskaraz Plaza Berria izena berreskuratu beharrean, Konstituzio Plaza izendatu zen.
Inoiz galdu behar izan ez zen izena dela dio Dani Goñik, Plaza Berria Berreskuratu Dezagun Ekimenaren sustatzaileetako batek. "Historian zehar, politikaren haizeen arabera izen dantza egon da, hortaz, tradizioa bermatzeko, egokiena Plaza Berria izena berreskuratzea dela deritzogu".
Momentuz, izen aldaketaren eskaera ez da ofiziala, nahiz eta udaletxeari asmoak adierazi zaizkien. "Ez dugu nahi, orain, hauteskunde testuinguruan gaudela, izen aldatzearen proposamena zikintzea, hortaz, momentuz gure jarrera adierazi nahi izan dugu eta, noski, gurekin ados daudenei bat egiteko proposamena luzatu".
Goñik adierazi du Plaza berria izena erabiliko dutela sinatzaileek haien jarduera guztietan, bestalde, eskatzen diete gainontzeko eragileei, eta, bereziki, komunikabideei, haien erabilera errespetuz har dezatela eta beren ekimenei buruz hitz egiterakoan Plaza Berria izena erabiltzea.
Ekimenarekin bat egin nahi dutenek esteka honen bitartez egin dezakete izen ematea: https://form.typeform.com/to/SaSWg6Z0?typeform-source=blogak.eus