Prezipitazioak eta hodeiak gaurko egunerako Araban

Eguraldia hobetu egingo dela dirudi, baina hotz handiko egun bat espero da, Euskalmet Euskal Meteorologia Agentziak iragarri duenez.

Hala, gaur goizean hodei ugari eta prezipitazio apur bat izango da oraindik, baina arratsaldean ostarteak gailenduko dira. Goizean bereziki mendebaldean espero da euria edo elurra, elurra maila nahiko baxuetan, 100-300 metro artean. Eguerditik aurrera "ostarte politak agertuko dira ekialdean", eta arratsaldean mendebaldean ere agertuko dira. Gauean hodeiak ugarituko dira berriro ere, batez ere Kantauri isurialdean. Ipar-haizea nagusituko da, baina aurreko egunetan baino ahulago. Izotza egingo du barnealdean, bai goizean goiz eta baita azken orduetan ere.

Bihar termometroek pixkanaka goranzko bideari ekingo diote. Lurraldearen ipar-ekialdean goibelago egongo da eta "euri txikia egingo du". "Kantauri isurialdearen mendebaldean noizbehinka euri pixka bat egin dezake, baina hodeitza ez da hain trinkoa izango bertan", azpimarratzen dute Euskalmetetik. Elur-kota igotzen joango da, eta arratsaldetik aurrera 700-1000 metro inguruan egongo da. "Hegoaldean ere hodeiak ugarituko dira eta aurreko egunean baino lainotuago egongo da, bereziki Nafarroan. Barnealdean izotza egingo du, batez ere mendi inguruetan. Mendebal/ipar-mendebaldeko haizea", gaineratu dutenez bertatik.

Ostiralean eguraldia ez da asko aldatuko. Zerua hodeitsu egongo da, bereziki ipar-ekialdean, eta bertan euri txikia egin dezake. Gainerako tokietan, hodeiak gailenduko diren arren, hodeitza ez da hain trinkoa izango eta zailagoa izango da bustitzea.