Sokatiralariei gorazarre

urretxu eta zumarragako herri kirol elkarteak sokatiraren inguruko bi ekitaldi antolatu ditu

Gipuzkoar askok ez dakiten arren, Urretxuk eta Zumarragak ere ekarpen handia egin diote sokatirari. Urretxuko jaietako astelehenean aspalditik kuadrillen arteko sokatira txapelketa antolatzen da eta hortik munduko txapelketetan parte hartu zuen eta Euskadiko txapelketa irabazi zuen talde bat sortu zen, 1970eko hamarkada amaieran. Urretxu eta Zumarragako Herri Kirol Elkarteak talde horretan du jatorria. Hala, elkarteak sokatiraren alde lan egin duten guztiei esker ona azaltzea erabaki du. Horretarako, bi ekitaldi antolatu ditu: omenaldia eta Euskadiko lur gaineko sokatira txapelketaren finala, 600 kiloko kategorian. Bi ekitaldi hauek datorren asteburuan izango dira.

Ostiralean, 20.30ean Urretxuko Labeaga aretoan, Gure herriak eta sokatira ekitaldia egingo dute. Ekitaldi horretan Herri Kirol Elkartearen sortzaileak eta sokatira taldean parte hartu zuten tiratzaileak omenduko dituzte. Gainera, bideo bat emango dute. Bertan, sokatiraren historia jaso dute, herriko tiratzaileen testigantzekin. Sorpresaren bat ere izango da.

Tiratzaile guztiak gonbidatzen saiatu dira. Norbaiti gonbidapenik heldu ez bazaio, Urretxu edo Zumarragako kultur etxera jo dezake gonbidapen eske.

Bestalde, igandean, hilaren 27an, Euskadiko lur gaineko sokatira txapelketaren finala jokatuko da Zumarragako Etxeberri auzoan, 600 kiloko kategorian. Txapelketa aparkalekuaren parean dagoen zelaian jokatuko da, 11.30etik aurrera. Zazpi taldek parte hartuko dute: Mutriku, Goiherri, Akelarre, Getxo eta Gaztedi A, B eta C. Urretxun noiz edo noiz jokatu da antzeko lehiarik, baina Zumarragan ez. Eusko Jaurlari-tzak baimena ematen badu, ikusleekin jokatuko da.

Bi ekitaldiak atzo aurkeztu ziren, Urretxuko udaletxean. Aurkezpenean Izaskun Arruti Herri Kirol Elkarteko idazkariak, Maialen Fidalgo Urretxuko zinegotziak eta Mikel Serrano Zumarragako alkateak parte hartu zuten. Guztiek sokatira taldeak eta Herri Kirol Elkarteak egindako lana goraipatu zuten.