Sormen Ola, gazteei zuzendutako kultur transmisio tailerrak

Asteazken honetan aurkeztu da Sormen Ola, Loraldiak eta UPV/EHUko kultura zerbitzuak, EHUKulturak, antolatua, 6-29 urte bitarteko gazteentzat zuzendutako euskal kulturaren transmisioa bilatzen duen tailer-programa. Ekimen honen helburua gazte-sormena sustatzea da, gazteei profesionalizatzeko bidean laguntzea, formazioa eta plaza eskainiz, elkarteak berezko dituen baloreak sustatzea, kultur aniztasuna islatzea eta diziplina aniztasuna, sormen-egonaldiak eskaintzea eta gazteen harremanak euskaraz sustatzea.

Sormen Ola programa hilean behin burutuko da, larunbata goizez eta ikastaro trinkoen formatoan. Horrela aukera izango dute aste bitartean tarterik ez daukaten gazteek eta Bilbotik kanpo etor daitezkeenek ere. UPV/EHUko Bizkaia Aretoan burutuko dira tailer guztiak.

Gaiak monografikoak izango dira, sormenaren alor ezberdinak landuko direla, urtarrila eta maiatza bitartean: dantza, musika, arte eszenikoak, literatura, ikus-entzunezkoak eta hitzak eta irudiak. Eta erreferentziazko eta eskarmentudun profesionalek eskainita: Jon Maya, Patxo Telleria, Joseba Sarrionandia, Paul Urkijo edota Miren Amuriza, besteak beste.

Gorka Morenok, UPV/EHU Bizkaiko Campuseko errektoreordeak azpimarratu du: “Sormen Ola proiektua gizartearekiko lankidetzaren adibide argia da; izan ere, gure ikasleak modu aktiboan parte hartzen du hainbat arlotan kultura-sorkuntzan”.

Eta Patxo Telleria sortzaileak eta saio hauetako parte hartzaileetako batek adierazi du, “honelako ekimenak guztiz beharrezkoak dira. Sortzaile bilakatu nahi diren gazteek beharrezkoa dute trebatzea eta esperimentatzea. Aurreko udan izan genuen esperientzia oso aberasgarria izan zen eta etorkizunean modu profesionalean arituko direnak hemendik sortuko dira”.

EHUkulturaren ekimenez, Bizkaiko campuseko ikasleentzat doakoa izango da. Beste parte hartzaileentzat 15€ko kostua izango du saio bakoitzak.