Turistek euskal hoteletan ematen duten gau-kopurua igo egin da

Joan den otsailean, Araba, Bizkaia eta Gipuzkoara iritsi ziren turistek batez beste 2022ko otsailean baino gau gehiago igaro zituzten hoteletan. Hala berresten du Eustat Euskal Estatistika Erakundeak egindako turismo-establezimendu hartzaileen inkestari buruzko txostenak. Txosten horren arabera, aurtengo otsailean Euskal Autonomia Erkidegoko hoteletako sarrerak % 18,5 igo dira, eta ostatu-gauak % 25,9, urtetik urtera. Zehazki, 212.846 sarrera erregistratu dira, eta guztira 401.066 gau igaro dira.

Zehazki, eta ildo beretik, sarrera guztien % 32,7 eta ostatu-gauen % 33,9, 2023ko otsailean, atzerritarrenak izan dira; sarreren kasuan, % 32,9ko igoera izan da eta, ostatu-gauenean, % 41,7koa. Estatuko jatorriko sarrera eta ostatu-gauen kopuruak, bestalde, gora egin du, urte artean, % 12,6 eta % 19,2, hurrenez hurren.

Lurraldeka, Araban, 27.814 sarrera eta 59.983 ostatu-gau erregistratu dira; alegia, aurreko urteko otsailean baino % 14,1 eta % 29,6 gehiago, hurrenez hurren. Bizkaian, hazkuntza % 28,8koa izan da sarreretan eta % 39,6koa, ostatu-gauetan; guztira, 97.467 sarrera eta 185.800 ostatu-gau izan dira. Gipuzkoan, 2023ko otsailean, 87.565 sarrera izan dira, 2022ko otsailean baino % 10,0 gehiago, eta 155.283 ostatu-gau, aurreko urteko hilabete berean baino % 11,6 gehiago. "Hiriburuka, sarrera kopuruak % 31,8 egin du gora Bilbon, % 18,1 Vitoria-Gasteizen eta % 10,2 Donostian. Antzera, ostatu-gauen igoera, aurreko urteko otsailarekin alderatuta, % 46,8koa izan da Bilbon, % 34,8koa Vitoria-Gasteizen eta % 12,0koa Donostian", azaldu dute txostenean.