Txagorritxu Foru Egoitzako aretoak handituko dira

Txagorritxu Foru Egoitzan obrak egitea, erabiltzaileen profil berrira egokitzeko. Foru Gobernu Kontseiluak atzo onetsi zuen Txagorritxuko foru egoitza zaharberritzeko obra kontratatzeko espedientea, Ramiro González ahaldun nagusiak azaldu zuen bezala.

Horrela, diputatu nagusiak zehaztu zuenez, obra horietan azalera handiagoko areto komunak jarriko dira, erabiltzaileen profil berrira egokitzeko, bereziki mugikortasun arazoak dituzten adineko pertsonen profilera edo gurpil-aulkietara. Bere hitzetan, “obra horren bidez, areto komunei azalera handiagoa emango zaie, erabiltzailearen profil berrira egokitu daitezen. Erabiltzaile berriek mugikortasun arazo gehiago dituzte eta gurpil aulki gehiago daude; beraz, espazio zabalagoak behar dira”. Gainera, azpimarratu behar da, bertan bizi diren pertsonen beharrei erantzun hobea emateko, obrak lehen, bigarren eta hirugarren solairuetako barnealdeetan egingo direla. Eta bi fasetan egingo dira. Zehazki, “erabiltzaileen beharrei hobeto erantzuteko, egoitzako beheko solairuko eta 1., 2. eta 3. solairuetako barne espazioen birbanaketa egingo da. Obra bi fasetan gauzatuko da eta lau areto komun handituko dira”, azpimarratu zuen.

Obra horien arrazoiari dagokionez, Arabako Foru Aldundiatik ahaldun nagusiak azaldu zuen eraberritzearen beharra egoiliarren profila aldatuz doala. Hau da, “erabiltzaileen profila pixkanaka aldatzen ari delako egin behar da erreforma”. Hasiera batean, erabiltzaile independenteago eta baliagarriago batentzako espazioak proiektatu ziren. Gaur egun, “mendekotasun maila handiagoa dute”, eta, kasu gehienetan, mugikortasun murriztua duten pertsonak dira, eta gurpil aulkia behar dute mugitzeko. “Beraz, espazio horiek ez dute azalera nahikorik egungo egoiliar motaren arabera erabilera egokia ahalbidetzeko”, erantsi zuen. Azkenik, nabamentzekoa da kontratu horrek 229.200 euroko zuzkidura duela, BEZa aparte, eta foru egoitzak berritzeko eta modernizatzeko planaren barruan kokatzen da, Europako Next Generation EU funtsek finantzatuta, Suspertze, Transformazio eta Erresilientzia Planaren esparruan. Funts horiek Arabako Foru Aldundiari emandako zuzkidura, guztira, 17,7 milioi eurotik gorakoa da 2023ra arte, hainbat baliabide eta gizarte zerbitzu hobetzeko.

Bestalde, EH Bildu Arabako batzarkide taldeak salatu du aurten ere udako oporraldian “errepikatu egin direla” foru egoitzetan langileak ordezkatzeko “arazoak”. Hala, eta ildo beretik jarraituz, Claudia Venceslao EH Bilduko batzarkideak adierazi zuenez atzo, “IBFSko langileen batzordeak eta egoitza publikoetako langileek beste behin ere pairatu dute Foru Erakundearen antolaketarik eza udan”. Gaineratu zuenez, arazo hori langileek ordaindu dute, eta, horren ondorioz, “egun libreak hartu ahal izango zituzten ezin jakin egon dira azken unera arte”, erantsi zuen. “Egoera horiek ohikoak izaten hasi dira udan eta Gabonetan. EH Bilduk sarritan salatu du oporraldietan errepikatu egiten dela praktika hori, baina uda honetan egiaztatu ahal izan dugunez, Foru Erakundearen erabakien ondorioa da plantillei lan gehiago ematea, berez oso justu dabiltzan kategoria profesional batzuetan, adibidez, erizaintzan”, gaineratu zuen EH Bildutik Venceslaok.