Txikigune, Aste Nagusiko txikiei zuzendutako lekua, salbamendu gune bihurtuko da

Aurtengo Aste Nagusian “Txikigune” parkea, umeei eta familiei zuzendutako topagunea, “Planetaren Salbamenduko Zentro Unibertsala” bihurtuko da. Txikiguneko egitarauaren barnean umeek eta familiek, erronka ludiko-pedagogikoen bitartez, garapen jasangarriaren esanahia ezagutuko dute, 2030 Agendan dauden 17 GJHak identifikatuz.

Hezkuntza-jolasaren bitartez, 33 jarduera dibertigarri, dinamiko eta parte-hartzaile planteatuko dira, eta ardatz estrategikoak Pertsonak, Planeta, Bakea, Oparotasuna eta Aliantzak izango dira.

Itziar Urtasun Jaietako zinegotziak Aste Nagusian hirira iritsiko diren berritasun hauek azaldu ditu. “Aste Nagusian, Planetan eragindako hondamendiak prebenitzeko, konpontzeko eta, batez ere, horien gainean jarduteko interesa duten guztiak bilduko ditugu, eta antolakuntzaren aldaketaren eta eraldaketaren Agente aktibo bihurtuko ditugu. Umeak eta gazteak aldaketaren agente izatea behar dugu, inor atzean utziko ez duen hiri jasangarria sortzeko”, iragarri du Itziar Urtasunek.

Txikigunean, bertako “B-Agentzia” Eskolan, parte hartzen dutenek Botxorrak agente edo B agente titulua lortuko dute, eta ezagutza, trebetasun, balio eta, batez ere, hiriaren garapen jasangarrian laguntzeko ahaldunduko dituzten trebeziak eskuratuko dituzte.

Aurtengo edizioan, kontuan hartuta jendeak oso harrera ona izan ohi duela –2019an, 144.000 pertsonak gozatu zuten eskaintzaz–, Udalak 0 eta 12 urte bitarteko adingabeei zuzendutako jarduerak eta atrakzioak eskainiko ditu 4 gunetan banatuta. Bertan, puzgarriak, ludoteka sortzailea, irakurketa-gunea, bola-igerilekua, magia, birziklatze-tailerrak, mozorroak eta makillajea, arrantza… egongo dira. Jolas horien bitartez, elkartasuna, aniztasuna, berdintasuna, jasangarritasuna, sormena, identitatea eta antzeko balioak adingabeei barneratzen saiatuko gara, dibertitzen diren bitartean.

Era berean, Udalak beste helburu bat du: familiek aisialdiaz elkarrekin gozatzea, nagusiek jolasetan parte hartzea eta umeekin denbora eta dibertimendua partekatzea.

33 JARDUERA PARKEKO 4 GUNETAN

Abuztuaren 21etik 28ra igandetik igandera, goizez eta arratsaldez, Casilda Iturrizar parkeko Pergolan, Ahateen urmaelerarte zabalduz, dagoen Txikiguneak 11:00etatik 14:30era eta 16:30etik 20:00etara irekiko ditu ateak, eta adinaren arabera diseinatutako hogeita hamar jarduera baino gehiago eskainiko ditu.

Txikienek, 0 eta 3 urte bitartekoek, euren zentzumenak estimulatuko dituzten hainbat gune ezagutuko dituzte Aste Nagusiko Txikigunean, hala nola Hareagailu Interaktiboa, Txiki Laboratory izenekoa edo Oxizeanoa. Baita euren energia guztia gastatzeko beste leku batzuk ere, Experiteka psikomotrizitate zirkuitu erraldoia, edo Plankt-on, koloretako bolak dituen igerilekua.

Jarduera horietan gauzatuko diren dinamikek, besteak beste, berdintasunarekin, parte-hartzearekin, bizikidetzarekin edo klimaren eta itsaspeko bizitzaren defentsarekin erlazionatutako balioak barneratzera bultzatuko dituzte umeak.

Helduagoek, 3 eta 12 urte bitartekoek, Garapen Jasangarriko Helburuak lortzea ahalbidetuko duten jarrerak garatzearen garrantzia ere landuko dute. Kasu honetan, adibidez, dibertitu egingo dira, klima, itsaspeko ura eta lehorreko ekosistemak, osasuna eta ongizatea defendatzeko ekintzen edo desberdintasunak murriztearen garrantzia barneratzen duten bitartean.

Horrela, araztegien lana ezagutuko dute, ura protagonista izango duten puzgarriekin; elkarlanean arituko dira eta taldean lan egingo dute zurezko jokoekin; birziklatutako materialekin ontzi bat eraiki ahal izango dute eta funtzionatzen duen ala ez ikusi; eta grabitatearekin esperimentatu ahal izango dute ohe elastikoetan salto eginez.

Adin guztietarako diseinatutako espazioak ere egongo dira, hala nola makillaje tailerrak, irratia, ipuin kontalariak, eraikuntza jolasak eta photocall bat.

Txikiguneak Bilbobuseko bere geltokia izango du, antzerki ikuskizun batekin. Gidaria B Agentea bihurtuko da 12:30ean (euskaraz) eta 18:00etan (gaztelaniaz) egingo den ikuskizunean. Horrez gain, 16:30ean, Bilbobus bat eraikitzeko tailerra egingo da gune horretan.

Euskaltelen eskutik, bizikletaren erabilera bultzatzeko eta bertan ibiltzeko teknika hobetzeko trebetasun-zirkuitua prestatuko da. Begirale espezializatuen laguntzarekin, bizikletarekin Bilbon modu seguruagoan ibiltzen ikasiko dugu. Jarduera hori 6 eta 12 urte bitarteko umeei dago zuzenduta.

Parkeak, gainera, lorategiak apainduko dituen marigorringoen kolonia handi bat izango du (Gau Zurian erabili den instalazio artistikoa), eta bi pertsonaia historiko: Parkea eta bisitariak babestuko dituzten Casilda Iturrizar eta Ricardo Bastida. Casilda eta Bastida Itziar Urtasunekin egon dira prentsaurrekoan eta Bilboko Udala 2030 Agendaren inguruan egiten ari den lanari buruzko iritziak partekatu dituzte.

KALEKO ANTZERKIA 19:30EAN

Casilda Iturrizar Parkeko Txikigunea Antzerki eta Kaleko Arte Eszenikoen agertoki gisa finkatu da jaietan. Arratsaldetan, 19:30etik aurrera, hauek iritsiko dira Pergolara: Eidabe, “Gora bihotzak!” obrarekin; Chirs-iris, “Gap of 42” lanarekin; Akelar, “TNT” ikuskizunarekin; eta Circo Los, “Kasumay” emanaldiarekin. Era berean, Panpotxen “Arin arin erbiaren abenturak”; Hutsun + Ortziren “Txalaparta hutsa” eta Tippiaren “Plas & Co” ere ikusi ahal izango dira.

“UMEEN ADISKIDEEN HIRIKO” TXU TXU TRENA

Udalak martxan jarriko du berriro “Umeen Adiskideen Hiriko” Txu Txu trena. Doako anezka-zerbitzua izango da eta 25 minuturo ibiliko da pertsona guztiak Txikigunera eramateko. Tren horiek umetxoentzako orgatxoak eramateko egokituta egongo dira, eta mugikortasun urriko pertsonak zuzenean sartu ahal izateko arrapala izango dute.