Unibertsitatean karrera profesionala amaitu ondoren, zenbat denbora behar da, batez beste, espero den enplegua lortzeko? Bada, azterlan baten arabera, hiru urteko batez bestekoa.
Hala, eta ildo beretik, Euskal Herriko Unibertsitateko 2018ko promozioko tituludunen % 87 lanean ari zen graduko ikasketak amaitu eta hiru urtera. Hori da, hain zuzen, Lanbide-Euskal Enplegu Zerbitzuak euskal unibertsitate publikoko graduatuei buruz egin duen Laneratzeari buruzko azterlana txostenean jasota dauden ondorio nagusietako bat.
Inkesta 4.464 pertsonari egin zitzaien eta erantzunen indizea % 73koa izan zen. "Aipatutako promozioaren kasuan, okupazio tasa (lan ordaindua duten pertsonen ehunekoa pertsona aktibo guztiekiko), esan den bezala, % 87koa da; jarduera tasa (lan egiten duten edo lana bilatzen ari diren pertsonen ehunekoa) % 92koa; enplegu tasa (lan ordaindua duten edo jarduera profesional independentea duten pertsonen ehunekoa pertsona guztiekiko) % 80koa; eta langabezia tasa (lana bilatzen ari diren pertsonen ehunekoa pertsona aktibo guztiekiko) % 13koa", azaldu zuten EHUtik ikerketa hori jakitera ematerakoan.
Bestalde, txostenak aipatzen duenez, ratio horien ehunekoak ez dira aldatzen sexuaren arabera. "Bereziki garrantzitsua den beste datu bat hauxe da: hogei bat titulazioren kasuan okupazio tasa % 100ekoa da edo horretatik oso gertu dago (horien artean, Medikuntza, Odontologia, Telekomunikazio Teknologiaren Ingeniaritza, Ingeniaritza Elektronikoa, Ingeniaritza Elektrikoa, Industria Antolakuntzaren Ingeniaritza, Farmazia, Erizaintza, Biokimika eta Biologia Molekularra, Industria Elektronikaren eta Automatikaren Ingeniaritza, Ingeles Filologia, Elikagaien Teknologia eta Giza Nutrizioa eta Dietetika)", azpimarratzen zuten.