Teknologia funtsezko tresna bihurtu da euskal gizarte gazte eta helduarentzat. Irudi arrunta da gazteak beren telefono mugikor eta ordenagailuetara konektatuta ikustea, ordainpeko telebista kontsumitzea eta online ere komunikatzea. Errealitate hori agerian geratzen da gizartetik egunero jasotzen den irudian. Hala ere, badira joera berri hori berresten duten estatistikak eta teknologiaren aldeko apustu sendoa. Izan ere, estatistiken arabera, Araban, Bizkaian eta Gipuzkoan milioi bat t'erdi pertsona baino gehiago konektatzen dira Internetera, bai etxean, bai lanpostuan; hau da, euskal gizarte osoaren % 85 inguru. Datu horiek erakusten dute nabarmen egin duela gora iazkoaren aldean; Eustat Euskal Estatistika Erakundeak egindako datuak dira.
Hala, txostenek erakusten dutenez, arabarrak eta euskal gizartea gero eta gehiago ari dira prestatzen aro digitalean; adinagatik eta jatorriagatik Interneten konektatzeko eta nabigatzen ikasteko zailtasun handiagoa duten adinekoek ere. Horrela, erakunde honek gai honi buruz egindako azken txostenean azaltzen den bezala, Euskal Autonomia Erkidegoan (EAE), 2021ean, 15 urtetik gorako 1.602.600 pertsonak erabiltzen dute Internet, hau da, azken hiru hilabeteetan EAEn pertsona kopuru hori konektatu da Internetera –etxean izan, lantokian izan edo beste leku batean izan–. Pertsona kopuru hori adin horietako EAEko biztanle guztien % 84,9 da. "Aurreko urteko aldi bereko datuekin alderatuta, ehuneko horrek 2,3 puntutan egin du gora", azpimarratzen dute. Beraz, Internet gero eta gehiago erabiltzen da, baina adierazgarriena adin tartea da. Izan ere, duela urte batzuetatik gertatzen ari den bezala, 65 urteko edo gehiagoko biztanleria da Internet gehien erabiltzen duena; zehazki, zazpi puntu portzentual baino gehiago. Datu horien arabera, Internet erabiltzen duen talde horretako biztanleriaren ia erdia nagusiak dira. "Aurreko urteetan bezalaxe, 65 urteko edo gehiagoko biztanleen artean igo da gehien Internet erabiltzaileen kopurua (ehuneko +7,3 puntu); 2021ean, talde horretako biztanleen ia erdiek (% 49,3) erabiltzen dute Internet", zehaztu dute. Hala ere, gainerako adin-tarteetatik oso urrun daude oraindik (gainerako adin-tarteetan % 90etik gorako ehunekoak jaso dira), eta batez ere 45 urtetik beherakoekin alderatuta, ia guztiek erabiltzen baitute Internet. Sexuaren arabera, Internet erabiltzen dute gizonen % 87,2k eta emakumeen % 82,8k. 2021ean, genero-arrakala ehuneko 4,4 puntuko da, hau da, 2020ko aldi berean baino ia puntu bat handiagoa. Arrakala edo alde hori handitu izana bat dator 65 urteko eta hortik gorako gizonek eta emakumeek Internet erabiltzeko izan duten bilakaera desberdinarekin (% 54,0 eta % 45,9, hurrenez hurren). 2021ean, aldea ehuneko 8,1 puntukoa da, eta 2020an, berriz, 6,3koa zen.Hala ere, aldeak daude emakume eta gizonen artean. Horrela, Interneten erabiltzen diren zerbitzuen artean, emakumeen % 64,5ek telefono-deiak edo bideo-deiak egiten dituzte Internet bidez (gizonek baino 9,3 puntu gehiago); emakumeen % 52,3k osasunarekin lotutako zerbitzuak erabiltzen dituzte, hala nola osasun-gaiei buruzko informazioa bilatzea (gizonek baino 8,8 puntu gehiago); eta emakumeen % 17k online ikastaroak egiten dituzte (+6,3 puntu). Bestalde, gizonen % 31,9k jolasten dute edo jokoak deskargatzen dituzte (+5,5 puntu), % 70,8k bideo-edukiak ikusten dituzte partekatzeko (+5 puntu) eta % 77,1ek albisteak, egunkariak edo aldizkariak irakurtzen dituzte (+4,2 puntu). Ildo horretatik jarraituz, Euskal Autonomia Erkidegoan, Arabak du Interneteko erabiltzaileen ehunekorik handiena (% 87), aurreko urteko aldi berarekin alderatuta 2,5 puntuko igoera izan ondoren. Igoera hori bera islatzen da Bizkaian 2020ko datuekin alderatuta (+2,5 puntu), pertsonen % 84,2k erabiltzen baitu Internet. Azkenik, Gipuzkoan zertxobait gutxiago hazi da azken urte honetan (+1,9 puntu), eta % 85,1era igo da erabiltzaileen ehunekoa; EAEn bigarren lekuan dago. "Euskadiko hiru hiriburuek beren lurralde historikoetako posizioak errepikatzen dituzte: hiriburuen artean Gasteizek du Internet erabiltzaileen ehunekorik handiena (% 87), ondoren Donostiak (% 84,2) eta Bilbok (% 83,8). Eskualdeen arteko aldeak ehuneko 5 puntukoak dira, gutxi gorabehera. Baliorik handiena Gorbeialdean erregistratu da (% 88) eta txikiena Markina-Ondarroan (% 83,7)", gaineratzen dute txostenean. Gainera, jarduerari erreparatuta, ia ikasle guztiek (% 99,7) erabiltzen dute Internet, ondoren biztanleria landuna dator (% 98,7) eta, azkenik, biztanleria ez-aktiboa eta langabea (% 65,6). Aurreko aldiarekin alderatuta, azken talde horretan hazi da gehien erabilera (5,2 puntu), baina, hala ere, gainerakoetatik oso urrun dago, % 33tik gorako aldearekin. Hizkuntzari dagokionez, gaztelaniak irabazten jarraitzen du. Gaztelania (%98,3), euskara (%23,1) eta ingelesa (%17,1) dira nabigaziorako hizkuntza nagusia. Bestalde, batez ere norberaren etxean erabiltzen da, erabiltzaileen % 98,3 etxetik konektatzen dira.
Internet gero eta gehiago erabiltzen da; adierazgarriena adin tartea da. Egun adinekoek asko erabiltzen dute internet.
Araban, Bizkaian eta Gipuzkoan 15 urtetik gorako 1.602.600 pertsonak erabiltzen dute Internet, hau da, %85a inguru
Xehetasunez
Teknologiaren erabilera. Teknologia funtsezko tresna bihurtu da euskal gizarte gazte eta helduarentzat. Irudi arrunta da gazteak beren telefono mugikor eta ordenagailuetara konektatuta ikustea, ordainpeko telebista kontsumitzea eta online ere komunikatzea. Errealitate hori agerian geratzen da gizartetik egunero jasotzen den irudian. Hala ere, badira joera berri hori berresten duten estatistikak eta teknologiaren aldeko apustu sendoa. Izan ere, estatistiken arabera, Araban, Bizkaian eta Gipuzkoan milioi bat t'erdi pertsona baino gehiago konektatzen dira Internetera, bai etxean, bai lanpostuan; hau da, euskal gizarte osoaren % 85 inguru. Datu horiek erakusten dute nabarmen egin duela gora iazkoaren aldean; Eustat Euskal Estatistika Erakundeak egindako datuak dira.
Aldeak. Sexuaren arabera, Internet erabiltzen dute gizonen % 87,2k eta emakumeen % 82,8k. 2021ean, genero-arrakala ehuneko 4,4 puntuko da, hau da, 2020ko aldi berean baino ia puntu bat handiagoa. Arrakala edo alde hori handitu izana bat dator 65 urteko eta hortik gorako gizonek eta emakumeek Internet erabiltzeko izan duten bilakaera desberdinarekin (% 54,0 eta % 45,9, hurrenez hurren). 2021ean, aldea ehuneko 8,1 puntukoa da, eta 2020an, berriz, 6,3koa zen.