Zarautz | Udalak hiru proposamen aurkeztu ditu hegoaldeko trenbide azpiko pasabiderako

ZARAUTZ – Zarauzko hegoaldeko trenbide azpiko pasabidearen inguruan, hiru alternatiba aurkeztu ditu Udaleko hirigintza arloak. Xabier Txurruka alkateak aurkezpenean azaldu zuenez, "aukera desberdinak aztertzeko enkargua Asmatu ingeniaritzak egin du, esperientzia baitu egiteko hauetan, Santa Klarako pasabidean obra zuzentzeaz ere arduratu zen".

Mitxelena eta Lapurdi kaleen artean, Mitxelenako aparkalekuaren parean aurreikusten da proiektua. Dena den, hiru proposamenetako bakoitzak ezaugarri eta zehaztapen desberdinak ditu. Horregatik, hirurak jendaurrean jarri dituzte interesdunek ekarpenak egin eta iritzia eman dezaten. Gaia zarauztarrekin lantzeko, Udalaren webguneko partaidetza atala prestatu dute. Ekarpenak irailaren 30era arte egin ahal izango dira.

Halaber, uda honetan plazatik hurbilen dauden jabekideen erkidegoekin harremanetan jarriko dira, zuzenean iritzia eman dezaten.

Iruzkin guztiak bildu eta aztertu ondoren, Udalak aukerarik egokiena aukeratuko du, eta hegoaldeko puntu horretan hiri-irisgarritasuna hobetzeko oinarrizko proiektua idazteko enkargua abiaraziko du segidan.

ibilbide luzeko proiektua

Hegoaldean trenbidearen bi aldeen arteko lotura, Mitxelena eta Lapurdi kaleen artekoa, Udaletxean ibilbide luzea duen proiektua da. Bertatik zehaztu dutenez, proposamen eta plan batzuk 1987koak dira. Orain, gauzatzeko urrats garrantzitsua eman da, eta beraz, etorkizunean "hegoaldeko trenbidearen azpiko pasabide horrek nabarmen hobetu ahal izango du hiri-konektibitatea, Zelai eta Iñurritzako egungo pasabideen artean dagoen punturik urrunenean".

"Historia handiko" planarekin aurrera egin baino lehen, ordea, "beharrezkotzat" ikusi dute inguruko herritarrak entzutea eta horretan jardungo dute uda honetan zehar.