Zarauzko Kuadrillen Eguna hurrengo larunbatean egingo da

Zarauzko Kuadrillen Eguna datorren larunbatean ospatuko da. Egun horretan herriko kuadrilla guztiak festara irtengo dira antolatu duten egitarauaz gozatzera.

Egitaraua hiru gunetan banatu dute, adinaren arabera: Haurren gunea (Salbide parkean), Nerabeen gunea (Lege Zaharren enparantza) eta Gazteen gunea (Musika plaza).

Haurren gunean, 10.30ean hasiko dira ekitaldiekin Altxorraren bila jolasarekin. 45 minutu geroago aurpegia margotzeko aukera izango dute bertara gerturatzen diren haurrek. Eguerdian, erraldoi txikiak egongo dira kalejiran eta arratsaldeko 17.30ean Alizia mundu miresgarrian kalejira girotua egingo dute.

Nerabeen gunean 16.00etan hasiko dira ekitaldiekin. Ordu horretan Bubble Balls-en ibiltzeko aukera paregabea izango dute eta ordu bete beranduago, ginkana mugikorrean. Ordu berean oihalezko poltsak margotzeko aukera izango dute. 19.30 ean eta 22.00etan Dj Txurru eta Dj Davila egongo dira giroa alaitzen.

Azkenik, gazteen gunean 9.45ean goitibeheren jaitsierarekin hasiko dira Vista Alegretik. 12.00etatik aurrera herri kiroletan ibiliko dira eta orduerdi beranduago paella lehiaketa egingo dute. 14.00etan bazkariaren eta bingo musikatuaren txanda izango da. Arratsaldeko 18.30ean Fresamorango Dj ibiltaria egongo da kaleetatik.

Azkenik, kontzertuak egongo dira: 20.30ean Akertbeltz taldea igoko da oholtzara. Ondoren, 22.30ean Ithaka taldearen txanda izango da eta 0.00etan Gozategi taldeak joko du Munoan.

Lizardi aretoan 18.30etik aurrera Dj Javi eta Dj Ephy egongo dira eta ondoren Merina Gris hirukote donostiarraren txanda izango da.