Zumarraga: Santamariaren omenezkoa astelehenean jokatuko da

Datorren astelehenean Anabel Santamariaren oroimenezko eskubaloi txapelketa jokatuko da Zumarragako Ispilla kiroldegian. Urolak Donostiako Bera Bera taldea gonbidatu du aurten. 16.00etan kimu mailako talde mistoek jokatuko dute, 17.00etan haur mailako neskek, 18.00etan kadete mailako neskek eta 19.00etan senior mailako neskek. 20.15ean saski bat zozkatuko da.

Txapelketa honen helburuak eskubaloia ezagutzera ematea eta neuroendekapenezko gaixotasunen ikerketa bultzatzea dira. Hala, bildutako diru guztia Biodonostia osasun ikerketarako institutuari emango zaio.

Txapelketa honek hainbat diru iturri ditu. Urretxu eta Zumarragako hainbat farmaziatan itsulapikoak jarri dituzte eta bi udalen laguntza du. Horretaz gain, egunean bertan saskirako txartelak eta merchandising produktuak erosi ahal izango dira.

Txapelketari izena ematen dion emakumea, Anabel Santamaria zumarragarra, 2016ko urriaren 23an hil zen Zumarragako ospitalean, gaixotasun luze eta sendaezin baten ondoren: atrofia multisistemikoa.

Santamaria Urola eskubaloi taldeko bi jokalari ohien ama eta klubeko zuzendari teknikoaren emaztea zen. Bere oroimenean, klubak zale “zintzo” eta “gogotsu” hori omentzea erabaki zuen.

Baloreak

Horretarako, lagunarteko txapelketa bat antolatzeari ekin zioten. Izan ere, Santamaria hobeto deskribatzen duten baloreak “adiskidetasuna, elkartasuna eta talde lana” dira. Berari eta lekukoa hartu zutenen lanari esker, Urolak 160 jokalari baino gehiago ditu denboraldi honetan. Jokalari horiek guztiak 11 taldetan banatuta daude. Klubean 40 lagunek baino gehiagok lan egiten dute.

Santamariaren oroimenezko aurtengo txapelketa astelehen arratsaldean aurkeztu zen. Ekitaldian Javier Ruiz neurologoak, Angel Maniega Urolako lehendakariak, Jose Manuel Moran klubeko kirol zuzendari eta Santamariaren alargunak eta Mikel Serrano Zumarragako alkateak parte hartu zuten.

Ruiz Medikuntza eta Kirurgiako lizentziaduna da Nafarroako Unibertsitatean eta Medikuntza eta Kirurgiako Doktorea Euskal Herriko Unibertsitatean. Gainera, Mugimenduaren Nahasteen masterra egin zuen Murtziako Unibertsitatean. EHUko irakaslea, Biodonostiako ikerlaria, Espainiako Neurologia Elkarteko kidea eta EAEko Neurologia Elkarteko kidea da.